اخر الأخبار

سوبر هاتريك .. طارق محمد عبد الله يكتب :.لالوم ولاتثريب على بشة اذا مشى حضر المسلسلة …!!

&& وصيف السنين المسكين الاحمر غير الوهاج والذي خرج مبكرا من دوري الابطال( قبل شاي الصباح )وجلس القرفصاء بالمنزل لاشغلة لامشغلة لامشاركة خارجية واخيرا نزل سماح الاتحاد العربي بمشاركة عدد من الاندية (صحبة راكب )مع ابطال تلك الدول (بردا وسخانة )يعني جو معتدل على الممكونين وصابرين ودايرين ليهم اي مشاركة والسلام (تسكت )الهلالاب شوية لانو بالجد القعاد في (الهاوس )جمب انبوبة الغاز وشمال الثلاجة الكولدير حاااااااااااااااااااار ده من ناحية ..!!

&& ومن جهة تانية فان البرد والسخانة (التهاب عديل ) للوصيفاب  الخايفين من بهدلة اكتر من الحصلة امبارح دي ومافعله سفيان عز الدين(ولدنا بتاع شباب الهلال بي اعمامك جمال ونمر وامير ) تحت قيادة المدرب الشاب هيثم مصطفى يمكن لاي نادي عربي من طرف ان يفعل اكثر منه مما ينبىء (بسفن اب جديد يعني شلباية كرت كرتونة )وده العقلاء بالقلعة الحمراء خايفين منو وحيال المشاركة العربية القادمة للوصيف نكتفي بالقول( السترة والعيبة متباريات) ..!!

&& وياوصيفاب بي حالكم المايل ده  تقعدوا ساااااااااااكت( ووب) تشاركوا من اجل المشاركة (ووبين )واذا مظهركم  في الدوري المحلي كده في البطولة العربية حيكون كيف ..؟؟؟ خاصة وانتوا بدون رئيس و بدون هجوم (وبدون البدون زاتو )اقول ليكم حاجة انسحبوا من هسه او خلوا زيكو رئيس بعثتكم عشان يتدخل اذا طفح كيل الاهداف ويشيل ليكم  الكورة مكررا سيناريو الهروب الكبير واهو ترجعوا بهروب (محمول جوا) واصلا التعبير بين القوسين  عاجباكم …!!!

&& وفعلا المصائب مابتجي واحدة واحدة ودائما بتكون مع بعض (بربطة المعلم )عشان كده في الموسم ده فقد الضل مهاجمه بكري للايقاف واصيبت المقدمة الحمراء بالشلل النصفي جراء ذلك ويعيش النادي اسوأ فترة ادارية بسبب صراع بين مجلسين احدهم مقطوع الراس بدون رئيس والاخر سنده القانوني مجهجه جدا وسؤال من يدير الضل الان يمكن ان يصلح كمسابقة مليونية ولن يحصد الجائزة احد لان الامور ماشة كيف مافي زول عارف ..!!

&& ومازاد الامور تعقيدا  وعصلجة على جمهور المريخ المغلوب على امره 1/صفر من اهلي الخرطوم ان شيبوب الموهوب هارد الفشفاش وكواي القلوب يؤدي واحدا من اجمل مواسمه مع الهلال واذا استمر على هذا النسق حتى النهاية فلن ينافسه على نجومية الموسم (زول تاني )فهو ماشاء الله يقطع الكرات من الخصوم ويصنع اللعب لزملائه وفوق كل ذلك يتقدم ويحرز الاهداف (ماركة الكراع الطويلة على غرار الزراع الطويلة )فقد امن تأهل الهلال افريقيا امام ليسكر الليبيري ومنح الازرق اغلى النقاط محليا امام الخرطوم الوطني بهدف قاتل في اخر ثانية وتنتظره الجماهير الهلالية عشية الاحد ليكمل اللوحة الزاهية باذن الله امام توغو بورت …!!

اهداف سريعة ..اهداف سريعة

&& امام توغو بورت (مواجهة الرجم بالاقوان) فان مهمة بشونا على غرار مارادونا احراز ثنائية مبكرة (تشتبن )في الشباك التوغولية منذ الحصة الاولى .

&&(وبعد داك )لالوم ولاتثريب على محمد احمد بشير بشة اذا مشى حضر المسلسل مع افراد اسرته الصغيرة او اثر متابعة باقي المباراة بمزاااااااااااج عبر التلفاز بفندق الجوهرة الزرقاء.

&& اما كاريكا بصراحة كده عليه ان يدع (الصلبطه )في تنفيذ الضربات الثابته جانبا لانه باختصار شديد لايجيدها وفي كم زول احسن منو في الجانب ده ..!!

&& وليت القائد يسعى حثيثا لاستغلال سرعته ومهارته مركبات تفوقه الحقيقية من اجل احراز هدف  او اتنين والمساهمة بفعالية في منح  الازرق بطاقة الترشح  لدور المجموعات بحول الله وقوته ..!!

&& بعد الظهوراللافت لجمعة جينارو امام الخرطوم القوي لانعتقد ان المجال متاح لاشراك مكسيم اساسيا مرة اخرى قبل ان ينقص وزنه ويستعيد رشاقته المفقودة ..!!

&& ولابد من ردم المؤاني التوغولي اولا بالهجوم الضارب من قولة تيت ومن ثم رجمه بالاقوان .

&& ومن الليلة ولي يوم دااااااااك يالتوغولي ارجى الراجيك هلالنا متحزم ومستنيك ..!!

&& والشعب الهلالي الرهيب هو وقود معركة الاحد الاغر.

&& (18) مارس ليلة زرقاء بلون البحر والسماء باذن الله

&& وطني نحن سيوف امجادك نحن هلالك نفدي ترابك.

&& وكل جميل هلالابي كانو النيل هلالابي .

&& واخيرا احمد الله كثيرا انني حي ازرق .

……………………………………………………………………………………………………………………………..

مع تحيات :

الجامعة العربية المفتوحة…………………..كلية بانقا (التسجيل مفتوح )………….. …………………….وبي انتلجنت الهندسية 

                                                    

مع تحيات :

الجامعة العربية المفتوحة…………………..كلية بانقا (التسجيل مفتوح )………….. …………………….وبي انتلجنت الهندسية 

                                                    

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى