اخر الأخبار

بالعربي الكسيح ..محمد الطيب الأمين يكتب:.بقينا نشتري (السيئات) بقروشنا !!

* حدد الدين الإسلام (الزي الشرعي) بالنسبة للمرأة المسلمة ..

* وإختصاراً هو أن يكون ساتراً وفضفاضاً ولا يشف (جغرافيا الجسم) بحيث لا يظهر من جسم المرأة ما يثير الرجل ..

* والتفاصيل كثيرة منها (لون الزي والخامة) ..

* على أن تتجمل المرأة وتلبس ما يشاء لها من ملابس داخل بيتها ..

* ومؤكد أن ما يحدث الآن في الشارع العام لا يرضي الله ولا يرضي رسوله الكريم ..

* الزي في الشارع العام أصبح خليعاً لدرجة بعيدة جداً ..

* البنات يذهبن إلي الجامعات والأسواق وأماكن العمل بملابس تصلح للنوم فقط ..

* ملابس تكشف أكثر من إنها تستر ..

* يا كافي البلا (البت شدة ما لابسة ضيق لو دققت في لبستها ممكن تعرف فصيلة دمها) ..

* وكمان قالوا ظهر إسكيرت جديد إسمو (HD) ..

* الطامة الكبرى هى أن (اللبس العاري) لم يعد مختصراً عند المرأة بل أن هنالك (أولاد) يلبسون ملابس هي في الأصل حقت (بنات) ..

* عادي جدا بتلقي ولد لابس ليهو (كارينا لونها ليموني) ..

* ولذلك تجدنا بإستمرار نقول : (التحية لكل بت ما قاعدة تشرب سجائر والتحية لكل ولد ما قاعد يلبس ملابس أختو) ..

* الملابس سواء كانت عند المرأة أو الرجل لابد أن نراعي فيها (كلام الله) فنحن لسنا بحاجة إلي سيئات ..

* من العبط أن نشتري (السيئات) بقروشنا ..

* تلقي الواحدة تشتري ليها إسكيرت بـ(300) جنيه عشان تلقط بيهو (52) ألف سيئة ..

* وإحتمال تموت قبل ما الإسكيرت ينتهي ..

* عموما .. الأناقة هي في اللبس الواسع والساتر ..

* بعيداً عن هذا وقريباً من (اللبس) أنا أريد أن أتحدث عن (الزي الرياضي) في نادي الهلال ..

* الهلال إرتبط بالإناقة طوال تاريخه ..

* وعنوان الهلال دائما هو فريق الكرة ..

* وبجانب بحثنا عن الإنتصارات والعروض الجميلة يجب أن لا ننسي (الأناقة) التى يتميز بها الهلال ..

* الأناقة في (اللبس) والمظهر العام ..

* في (اللبس) واحدة من أهم شروط الأناقة أن تكون (الملابس قدرك) ..

* يعني لما نجيب جلابية أستاذنا حسين خوجلي ونلبسها لصهيب الثعلب بيكون أشتر ..

* ونفس الشئ لما (فانلة) وليد علاء الدين تكون (قدر) فانلة جابسون برضو بتكون شينة ومشاترة ..

* هذه تفاصيل صغيرة يجب أن يراعيها مجلس الهلال منذ الآن ..

* أهم حاجة كل لاعب في الهلال نجيب ليهو (ملابس قدرو) ..

* عشان ما يكون في (لاعب بيلعب جوة ملابسو) ..

* أيضا من الملاحظات أن الهلال لا يحبذ الإبتكار في هذا الجانب ..

* يعجبنا ريال مدريد لانه يبتكر كثيرا فيما يتعلق بـ(الزي) ..

* والهلال لابد أن يبتكر أيضا في الزي من حيث التصميم وليس اللون ..

* اللون معروف (أبيض وأزرق) ..

* لكن التصميم مهم ..

* زمان الهلال كان عندو (شعار كم طويل) ..

* هسه ما في ما يمنع الهلال يعمل (كم طويل ، وكم قصير ، ويعمل شعار فيهو شكل لياقة ، ويعمل شعار فيهو شكل فتحت زراير) وكده يعني ..

* الإبتكار مهم ..

* الحاجة دي دايرة قروش والهلال الحمدلله عندو القروش ..

* يبقى لازم نميز أنفسنا بهذه الأناقة ..

* إحنا بنحب نشوف الهلال سمح في كل شئ ..

* ومثل هذه التفاصيل ليس بالضرورة أن يقوم بها الكاردينال ..

* ما أى حاجة لازم يعملها الكاردينال ..

* الكاردينال نخليهو للحاجات الكبيرة ..

* في حاجات يفترض يعملوها ناس العمدة سعد ومحمد عبد اللطيف والكرار ..

* وحتى روابط الهلال بالخارج يجب أن تراعي (الذوق) في الإختيار ..

* روابط الهلال بالخارج ما قاعدة تقصر ودائما بتقيف مع الهلال من خلال المعسكرات والمعدات الرياضية وغيرها من الأشياء ..

* الهلال ممكن يستعين بمصمم أزياء رياضي ..

* العام القادم دايرين الهلال يكون (ملفت للنظر) ..

* يكون زي الزول (البيستحمى العصر ويتعطر ويشك ويمرق) ..

* دايرين أفريقيا كلها تتكلم بأناقة الهلال وناس الهلال ..

* في حاجة تانية أيضا ..

* أنا لاحظت إنو لعيبة الهلال لما يجوا ياخدوا (الصورة الجماعية) قبل إنطلاقة المباراة بيقيفوا (وقفة واحدة) ..

* وقفة واحدة من سنة ستين ..

* (ستة واقفين وخمسة مدنقرين) ..

* الوقفة دي بقت مملة ذاتو ..

* ممكن نغير شوية ونجيب (جدعات جديدة) ..

* ممكن نقيف كلنا للصورة ، وممكن يقيفوا (العشرة والحارس يكون قاعد) ..

* المهم نعمل أي حركة ..

* كل مباراة لازم الهلال يدهش الناس ..

* حتى (الإحتفال بالهدف) لازم يكون فيهو تنوع ورسائل وصور ذكية ..

* زمان والى الدين عليه الرحمة لما يجيب القون بيقوم (يحبُو ومن خلفه اللاعبين يحبون) ..

* مهند الطاهر بيقلب الهوبا ..

* دايرين لاعب لما يجيب قون يمشي بنك الإحتياطي يشيل التلفون ويعمل نفسو بتكلم ..

* أو لاعب يجيب قون يمشي الكنبة يشيل ليهو فنجان ويعمل فيها بيشرب قهوة ..

* وكده يعني ..

* إحنا في الهلال يجب أن نقدم للناس (جدعات) ونتركهم يقلدون ..

* والحاجات دي غير إنها بتعمل شخصية للهلال فهي حاجات محبوبة عند الجمهور ..

* عموما .. أنا قصدت أن أكتب هذا الحديث الآن حتى تفكر إدارة الهلال في تجهيز أطقم لشعارات الهلال والملابس منذ الآن إستعدادا للعام القادم الذي تبقى له أقل من (60) يوما ..

* نعمل لينا شعار تكون الفانلة فيها (لياقة وكرفتة لاصقة) ..

* ونخلي ناس المريخ بكرة يعملوا ليهم شعار يكون فيهو (زراير زي حقت الجلابية) ..

* هم ديل طبعا بيعملوا أي حاجة يعملها الهلال ..

* ونركب صافنات ونجيبة (هلالابية) وأصلو الزول بيموت والذكرى تفضل حية ..

* و..و..

* والهلال و(الأناقة) أخوان أولاد خالات ..

………………………………………………………………………………………………………………………………………………………..

مع تحيات :

الجامعة العربية المفتوحة..……………….شركة اربيل العالمية ……………………….وبي انتلجنت الهندسية 

                                 

 

         %d8%a7%d8%b1%d8%a8%d9%8a%d9%84-%d9%84%d8%b9%d8%a7%d9%84%d9%85%d9%8a%d8%a9-%d8%a8%d8%a7%d9%84%d8%a7%d8%ad%d9%85%d8%b1-%d9%88%d8%a7%d9%84%d8%a7%d8%b5%d9%81%d8%b1         

 

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى