اخر الأخبار

بالعربي الكسيح ..محمد الطيب الأمين يكتب :. وكذلك فرحة (الفرخة) !!

* من (أصدق) أنواع الفرح : فرحة طفل بـ(لبسة العيد الجديدة) ..

* ومن (أقوي) أنواع الفرح : (الفرحة التى تحميك النوم) ..

* وفي حياتنا هنالك كثير من (الأفراح الصغيرة) التى (حمتنا النوم) ..

* أفراح صغيرة عند الناس و(كبيرة جدا) عندنا ومع ذلك (تحمينا النوم) ..

* وفي حياة كل واحد منا هنالك (فرحة طردت النوم من عيونه) وهي في الأساس فرحة بسبب (حاجة عادية جدا) عند السواد الأعظم من الناس ..

* جربنا فرحة إنك ما تنوم بسبب (التلفزيون الجابوهو ليكم جديد) ، وجربنا فرحة إنك ما تنوم بسبب (لبسة العيد) ، وفرحة إنك ما تنوم بسبب (الشغل الجديد) ، وفرحة إنك ما تنوم بسبب (الطيارة الحتركبها بكرة لأول مرة في حياتك) ..

* بتذكر زمان الواحد فينا بفرح لما يكون بكرة ماشي الإستديو يتصور صورة فتوغرافية ..

* والله صحي ..

* فرحة بسبب الصورة بتحمينا النوم ..

* أي حاجة جديدة في حياتك فرحتها بتطرد النوم من عيونك ..

* حتى (الكرفتة) لو ح تلبسها بكرة لأول مرة في حياتك ما ح تقدر تنوم من الفرحة الليلة ..

* وكذلك فرحة (الفرخة) ..

* الزول لما يكون عندو موعد في الأفطار مع الفراخ ممكن الليلة ما ينوم ..

* ده طبعا زمن كان الفراخ إسمو (جداد) ..

* المهم .. * الفرحة البتحصل لأول مرة في حياتك عادة بتأثر على (نومك) وممكن تظهر حتى على (صحتك) ..

* ولذلك أنا لاحظت أن (90%) من المريخاب لم ينوموا ليلة أمس الأول بسبب (الديمقراطية) .. * طبعا الديمقراطية جديدة في حياة أهل المريخ ولذلك فرحتهم كانت أكبر من فرحة (طفل بلبسة العيد) ..

* صحيح أن ديمقراطية المريخ ما جايبها حقها ولكن في النهاية أفضل من التعيين ..

* قالوا زمان زين العابدين الهندي السياسي المعروف سخر من الديمقراطية في إحدي خطاباته الشهيره بقوله : (والله الديمقراطية دي لو شالها كلب ما بنقول ليهو جر) ..

* وأنا ما عايز أقول ما قاله زين العابدين ، ولا عايز أقول ديمقراطية المريخ دي لو شالها كلب ما بنقوم ليهو جر ..

* عايز أقول إنو ديمقراطية المريخ عرجاء .. * حجم العضوية في المريخ عبارة عن حافلة هايس وتلاتة أمجاد ..

* لو جبت ليك (بص والي) عادي بتشيل كل عضوية المريخ وبدون شماعة كمان ..

* عضوية المريخ ما بتملأ ليها (نادي مشاهدة) ..

* نادي المشاهدة الموجود في (سوق حلتنا) الناس الفيهو أكتر من عضوية المريخ ..

* وده كلو من جمال الوالى ..

* جمال الوالى علمكم طبعة كعبة شديد ..

* علمكم التعيين بقيتوا ما بتعرفوا الإنتخابات ..

* جميعة فشلت في يومها الأول الذي شهد حضور (51) نفر ..

* ياخ (51) !!

* إحنا لما نكون ماشين رحلة الخزان بنمشي (52) نفر ..

* معقولة يا جماعة !!؟؟

* جمعية تقام بعد سنوات طويلة ويشارك في يومها الاول (51) ؟؟

* حاجة تكسف ..

* فشلت في يومها الأول ..

* ثم فشلت في يومها الثاني ..

* وفي اليوم الثالث أقيمت بـ(أي عدد) ..

* يعني لو ما القانون حدد (أى عدد) ممكن جميعة المريخ دي تفشل حتى ولو أعيدت (51) مرة ..

* وبعد ده كلو هي جمعية (ناقصة) ..

 * ناقصة رئيس ..

* إنتخابات أقيمت من منصب نائب الرئيس ولتحت ..

* ما في رئيس ..

* الرئيس الوحيد العندهم طعنوا فيهو (9) طعون ..

* وأنا طبعا مستغرب .. هو رئيس واحد طاعننو ليه ؟؟

* تطعنوا كيف وإنتو كلمكم جراح ؟

* انت بتطعن لما يكون عندك خيارات متعددة في الرئاسة ..

* لكن هو رئيس واحد لزوم الطعون شنو ..

* أنا والله عندي إحساس إنو ناس المريخ ديل فاكرين إنو الطعون دي حاجة زي التصويت ..

* عندي إحساس كده ..

* وأى زول طبعا حر في (محاسيسو) ..

* بيكون فاكرين كده ..

* مساكين ما عندهم فكرة عن الموضوع ..

* وده غلط ناس المفوضية ..

* ناس المفوضية إتعاملوا مع المريخ بإعتباره هلال ..

* وطبعا ده غلط ..

* يفترض المفوض يعمل كورسات لأهل المريخ يشرح لهم العملية الإنتخابية ومراحلها وأهدافها ويفصل لهم المسميات (طعن ، إستئناف ، تصويت ، نصاب) ..

* هذه الأشياء لا يعرفها نادي حديث عهد بالعملية الإنتخابية ..

* عموما .. ما فات شئ ..

* المتوقع أن يتم إسقاط الطعون عن سوداكال ويجلس بالتالي على كرسي الرئاسة ..

* طبعا كانت في محاولات و(بكا شديد) من أجل عودة الوالى ..

* لكن الوالى (واقف قنا) ..

* عشان كده ح يسقطوا الطعون عن أدم سوداكال على أمل أن يعود جمال الوالى بعد ثلاثة سنوات ويحكم بالتعيين ..

* طبعا ده إذا سوداكال ما جرى وخلى الشغلانية دي ..

* الموضوع ده صعب شديد ..

* سوداكال أول حاجة مطالب بأن يدفع حوالي تسعة مليار لغارزيتو ..

* دي مبدئيا كده ..

* تسعة مليار بعد داك شوف قروش وارغو وأقساط بكري ومحمد عبد الرحمن وعلاء يوسف ..

* أتوقع أن يهرب سوداكال من الرئاسة ..

* وإحنا غايتو السنة دي بالذات يا متنا من الضحك ويا كمان الضحك كتلنا ..

* ونركب صافنات ونجيبة (هبانية) وأصلو الزول بيموت والذكرى تفضل حية ..

* و..و..

* وتجرحني ليه وأنا كلي …(أتنين كيلو) .

…………………………………………………………………………………………………………………………………………….

مع تحيات :

الجامعة العربية المفتوحة..……………….شركة اربيل العالمية ……………………….وبي انتلجنت الهندسية 

                                 

 

         %d8%a7%d8%b1%d8%a8%d9%8a%d9%84-%d9%84%d8%b9%d8%a7%d9%84%d9%85%d9%8a%d8%a9-%d8%a8%d8%a7%d9%84%d8%a7%d8%ad%d9%85%d8%b1-%d9%88%d8%a7%d9%84%d8%a7%d8%b5%d9%81%d8%b1         

 

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى