اخر الأخبار

بالعربي الكسيح.. محمد الطيب الأمين يكتب :. أوضة وبرندة ومقدم (6) شهور !!

* سعادة كبيرة إجتاحت الشعب السوداني على مستوى (القيادة والمواطن) وحتى (المعارضة) وذلك بعد القرار التاريخي المتعلق برفع العقوبات المفروضة على السودان منذ (20) عاما ..

* وهي عقوبات ظالمة ما كان يستحقها هذا الشعب الكريم ..

* (20) سنة وإحنا ما شفنا (كنتاكي) ..

* (20) سنة والدولار يطلع وينزل زي (حمى التايفويد) ..

* بلغ الدولار مرحلة حرجة من (الدلال) حتى أنه أصبح (يطلع وينزل) في اليوم الواحد تلاتة مرات ..

* (20) سنة و(الجنيه السوداني) يرجع للخلف بـ(الأسانسير) بسبب أمريكا التى عاقبتنا ظلما ..

* (20) سنة والمتسول حينما يسألك وتمنحه (جنيه) يغضب لأن الجنيه لا يغني ولا يسمن ..

* الآن تم رفع العقوبات وسينطلق السودان ويتراجع الدولار ويعود للجنيه البريق واللمعان ..

* وحقيقة نأمل بأن يتزامن رفع العقوبات على السودان مع رفع (الدعومات) عن المريخ ..

* المريخ (مدعوم ومدفور) وآن الأوان أن يُرفع عنه هذا الدعم ..

* (15) سنة والحكومة تدعم المريخ في شخص جمال الوالى الذي دخل الوسط الرياضي عبر بوابة (التعيين) ولم يخرج إلا بعد ان (بطنه طمت) ..

* يعني لو بطنو ما طمت كان ممكن يواصل وعبر (التعيين) أيضا ..

* أول ما جمال الوالى طلع الجماعة إتكشفوا ..

* قاعدين في السهلة ..

* مؤسف والله أن يكون المريخ ما عندو (أسبير للرئيس) ..

* نادي رئيسه واحد .. إذا ذهب ذهب كل شئ ..

* أول مرة في حياتي أشوف لي نادي عندو مشكلة في (الرئيس) ..

* والله صحي ..

* مشاكل الأندية عادة بتكون في (الملاعب) أو في (المعسكرات) أو حتى في (الأقطاب الداعمين) ..

* ممكن النادي يكون عندو مشكلة في (الباك الشمال) أو مشكلة في (صانع الألعاب) أو مشكلة في (الدفاع) ..

* عادي ..

* لكن ما حصل في حياتي شفت لي (نادي عندو مشكلة في رئيس) ..

* نادي ما لاقي رئيس !!

* دي ما حصلت إلا في المريخ ..

* الصفوة ما لاقين ليهم رئيس ..

* الخيار الوحيد إنهم (يتجاوزوا كل حاجة) ويجيبوا أدم سوداكال ..

* غير كده ما في حل ..

* أى عيب إنتو شايفنوا في سوداكال لازم تتجاوزوهو عشان كمان ما ممكن ناديكم يكون بدون رئيس ..

* طبعا في فكرة تانية لكن إنتو ما أظن تقبلوا بيها ..

* الفكرة هي : تشوفوا ليكم رئيس (للإيجار) ..

* إحنا في عصر الإحتراف ..

* ولذلك يمكن أن تقوم بـ(إيجار) رئيس سواء ان كان (رئيس محلي) أو (رئيس أجنبي) ..

* المريخ قبل سنوات تعاقد مع مدير كرة أجنبي ..

* بل في التاريخ القديم .. المريخ إستعان بالرئيس أبو العائلة وهو هلالابي معروف ..

* الآن إذا أراد (المدفور) أن يخرج من هذا الحرج عليه أن يبحث عن رئيس بالإيجار ..

* وأنا برشح ليكم ..

* على المستوى الأفريقي ممكن تجيبوا (كاتومبي) رئيس مازيمبي على سبيل (الإيجار) ..

* طبعا شهاد البحث بتكون عند مازيمبي ..

* تدفعوا مقدم (تلاتة شهور) والعقد يتوقع وكاتومبي يجي يترأس المريخ ..

* لكن الخوف ما تلتزموا (بحق الإيجار الشهري) ..

* دي الحاجة الوحيدة الأنا خايف منها ..

* وأى زول طبعا حر في (مخاوفو) ..

* طبعا معروف سعر الإيجار بيختلف من رئيس للرئيس ..

* يعني سعر إيجار رئيس نادي الوحدات الأردني أقل من سعر إيجار كاتومبي ..

* الشغلانية دي نفس فكرة البيوت والأحياء وكده ..

* إنتو هسه شوفوا ليكم رئيس قدر حالكم (أوضة وبرندة) يمشي ليكم الحال لحدي ما يظهر ليكم رئس مريخابي في المستقبل ..

* وكمان لو مشيتوا على جيهات نيجيريا دي بتلقوا روؤساء أندية (بتراب القروش) ..

* رخيصين جدا ..

* ده فيما يتعلق بالإيجار من خارج السودان ..

* لو حابين رئيس محلي يبقي الخيارات راقدة ..

* قبل أيام عرضنا ليكم روؤساء هلالاب وفات علينا أن نعرض عليكم سعادة الفريق المدهش عبد الرحمن سر الختم ..

* إذا رفضتوا الروؤساء الهلالاب فهنالك خيارات اخرى ..

* يوجد محمد الشيخ مدني ، عمر البكري أبو الحراز ، كمال شداد ..

* لكن المشكلة ديل برضو هلالاب ..

* البلد كلها هلالاب ..

* إنتو زماااان مش كان الجاكومي عايز يدخل مجلس المريخ ؟؟

* بس خلاص ..

* جيبوا محمد سيد أحمد والموضوع إنتهى ..

* على الأقل محمد سيد أحمد مريخابي ..

* جيبوا الجاكومي أو سمير أو أسامة عطا المنان ..

* دي كلها خيارات ..

* ما تحتاروا ..

* ولا تزعلوا ..

* وعليكم الله من هسه أعملوا ليكم (رئيس أسبير) ..

* عشان لما رئيسكم يهرب يكون في أسبير ..

* ما ممكن نادي (15) سنة يقوده شخص واحد ، وبعد (15) سنة الشخص ده يمشي وما يكون في بديل ولا يكون في زول عندو نية ساكت يبقي رئيس المريخ ..

* الكلام ده عيب والله ..

* والتاريخ سيسجل أن المريخ فشل في توفير قائد لقيادته رغم أن فترة حكم جمال الوالى كانت كافية جدا لإعداد قائد يخلفه بعد الرحيل ..

* في الـ(15) سنة دي لو كان (ربيتوا ليكم زول هلالابي كان وقت ده بقى مريخابي ومسك ليكم النادي) ..

* (15) سنة كافية لإعداد وتجهيز قائد ..

* لكن إنتو ما فاضيين من التعيين ..

* لقيتوا (التسيير والدفر ده ونسيتوا المستقبل) ..

* تستاهلوا والله ..

* وغايتو الله يكفينا شر (المُصدي) اللمعتو الأيام ..

* ونركب صافنات ونجيبة (أمريكية) وأصلو الزول بيموت والذكرى تفضل حية ..

* و..و..

* رئيس شبيبة القيروان الأيام دي قاعد ساكت لكن داير مقدم (6) شهور !!

……………………………………………………………………………………………………………………………………………………

مع تحيات :

الجامعة العربية المفتوحة..……………….شركة اربيل العالمية ……………………….وبي انتلجنت الهندسية 

                                 

 

         %d8%a7%d8%b1%d8%a8%d9%8a%d9%84-%d9%84%d8%b9%d8%a7%d9%84%d9%85%d9%8a%d8%a9-%d8%a8%d8%a7%d9%84%d8%a7%d8%ad%d9%85%d8%b1-%d9%88%d8%a7%d9%84%d8%a7%d8%b5%d9%81%d8%b1         

 

 

 

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى