اخر الأخبار

 أصل الحكاية .. حسن فاروق يكتب :. ميرغني إدريس ياتو ياكاردينال…!!!


* جاء في الأخبار أن رئيس مجلس إدارة نادي الهلال متواضع القدرات والإمكانيات، أشرف سيداحمد الكاردينال، إختار ميرغني إدريس ليخلف عماد الطيب في الأمانة العامة لنادي الهلال بعد إستقالة الأخير لأسباب لم يتم الإفصاح عنها حتي الآن، قد لايعلم الرجل بحكم حداثة تجربته في العمل الإداري، أن ميرغني إدريس رفض قبله الترشح ضمن قائمة صلاح إدريس في الإنتخابات الشهيرة بنادي الهلال، مؤكد أنه لايعلم، الكاردينال طبعا راجل طيب، وهو يري في مايري النائم، أن قوته المالية الكاذبة تجعل طلباته أوامر، يعني ياميرغني إدريس تعال إشتغل معاي أمين عام في المجلس، يقوم ميرغني مايصدق، ويوافق وهو حامد شاكر، إنه الكاردينال شخصيا قام بتقييمه وتقدير تاريخه الطويل ومجهوداته في خدمة الهلال الكيان، وإختاره من دون خلق الله يشتغل معاه أمين عام.
* الظاهر الكاردينال قايل ميرغني فرحان زي عماد وسعد العمدة وغيرهم من القائمة البختارها معاه، والظاهر قايلو ممكن يكون كمبارس، قاعد صورة والقرار تجي من إعلام الكاردينال أو صفحة المنسقة الإعلامية على الفيسبوك وهو آخر من يعلم، إنت عارف ياكردنة مفروض أول حاجة تاخد كورس في تاريخ الهلال، وتعرف الناس الإشتغلوا في النادي ده من زمان شديد، وزمان قريب، عشان تعرف تصنفهم، أنا معاك إنه الزمن إتغير، وفي ناس كتار صدمونا، وظهروا على حقيقتهم، بعد التحولات الإستثنائية في الوسط الرياضي بظهورك إنت وغيرك، كنا قايلنهم أصحاب فكر وقرار، طلعوا كلهم خيالات مآتة، مواقفهم مبنية على مصالحهم، وبقوا صغاااااار، صغااااار، لمن الواحد بشفق عليهم، إتخيل لما الزول يكون ولا حاجة، لابهش ولابنش، المهم مصالحه ماتتضرر، كانوا شوارب يوقف عليها الصقر على قول أخوانا المصريين، مع الأثرياء الجدد حلقوها، وبقوا حاضر ياريس، تمام ياريس، أضرب لي فلان بتلقوا عنده القروش، اتصلوا على فلانة بتوريكم الحاصل، أو ياخ إنتو دافعين حاجة، أقروا بكره في الجرائد.
* تفتكر ياكردنة ميرغني إدريس ممكن يكون إمعة مجرد تابع فرحان بمنصب الأمين العام، عشان كده أقرأ التاريخ أول حاجة شوف ميرغني ده منو، هي الدنيا دي لو مابت هناي مفروض يكون هو الرئيس، جد والله، أقرأ ياكردنة بعدين فاوض، إنت قايلو لاعب كورة عشان تفاوضو، بعدين المنصب ده مش مفروض تكون فيهو إنتخابات، ولا عادي زي مابقيت رئيس كده وكده ممكن يعينو ليك أمين عام بدون إنتخابات.
* عشان كده بنصحك شوف ليك أمين عام مقاسك، قدر قدراتك، وهو في الغالب بكون أعلى منك في القدرات، لكن بعمل فيها أقل، يضحك على نكاتك البايخة، ويقوم لما تجي، فتش وبتلقي راقدين مالين الوسط الهلالي، بسمعوا ليك بإنصات عميق، وهم جواهم بقلوا كلام خارم، الزول ده بقول في شنو، أقول ليك حاجة ميرغني إدريس كان أمين عام لنادي الهلال في فترة مجلس عبدالرحمن سرالختم المعين، عارف المعلومة دي؟
* ميرغني إدريس لن يمسح تاريخه بالعمل معك، تأكد من ذلك.

…………………………………………………………………………………………………………………………………………………

مع تحيات :

الجامعة العربية المفتوحة..……………….شركة اربيل العالمية ……………………….وبي انتلجنت الهندسية 

                                 

 

         %d8%a7%d8%b1%d8%a8%d9%8a%d9%84-%d9%84%d8%b9%d8%a7%d9%84%d9%85%d9%8a%d8%a9-%d8%a8%d8%a7%d9%84%d8%a7%d8%ad%d9%85%d8%b1-%d9%88%d8%a7%d9%84%d8%a7%d8%b5%d9%81%d8%b1         

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى