اخر الأخبار

الصحفي والاذاعي المميز عبد العليم مخاوي في افادات ل(superhattrick):.تجربة صحيفة الهلال لن تتكرر ..برنامج المجال الرياضي عالم (براهو)..مقصر شديد مع اهل الحي..هذه رسالتي للكاردينال واقول للارباب راجع حساباتك وتحسس عشقك للهلال…وفضائية الازرق عمل احترافي جميل ..!!

عيد العليم مخاوي او صاروخ الصحافة الرياضية تميز في مجاله بصورة واضحة حتى بات رقما يصعب للصحف الرياضية تجاوزه تنقل في الاقسام المختلفة اجاد وابدع واستحق لقب رجل المهمات الصحفية الصعبة بحق ومن ثم خاض تجربة العمل بالاذاعة وحقق ذات النجاح السابق التقيناه في سوبر هاتريك في حوار شامل تطرق  خلاله العديد من مراحل مسيرته الابداعية وحتي لانفسده بالمطاولات تعالوا نتابعه معا عبر المساحة التالية :.
حوار :.طارق محمد عبد الله
&& في البداية نرحب بك ضيفا عزيزا بسوبر هاتريك وليتك تمدنا والقراء بتفاصيل ذاتية تكون مدخلا لحوارنا معك ؟؟؟
مرحب بيك الحبيب طارق ومرحب بكل فريق العمل في سوبر هاتريك الإلكترونية.. انا عبد العليم مخاوي.. من مواليد الخرطوم.. كل المراحل الدراسية كانت في الخرطوم ما بين القوز والحلة الجديدة والعمارات انتهاءً بجامعة جوبا كلية دراسات المجتمع والتنمية الريفية قسم الإعلام والعلاقات العامة.
&& ماهي الفوارق الاعلامية بيننا وغيرنا وهل الاعلامي السوداني مظلوم وموهوب حقا ام ان الامر مجرد ادعاء ؟؟
الإعلامي السوداني موهوب ومتميز ومتمكن رغم انو بشتغل في ظروف قاسية جداً منها ضعف المقابل المادي وعدم التقييم المناسب.. وإذا وجد الاعلامي السوداني 10% من البيئة المناسبة للعمل بإذن الله ح يقدم أفضل أداء.
&& محطات في حياة مخاوي الاعلامية صحيفة الهلال ،الموج الازرق الاذاعة الطبية وضح اثر كل محطة عليك ..؟؟
صحيفة الهلال كانت وستظل تجربة لن تتكرر أبدا في أي صحيفة رياضية مع احترامي وتقديري لكل الصحف الرياضية بيئة العمل الموجودة في صحيفة الهلال وفريق العمل وهيئة التحرير بقيادة الأساتذة قسم خالد وياسر عائس والقلع عثمان وهيثم السيد ومحمد الجزولي وطارق محمد عبد الله والنور يوسف ومهند ضمرة وعلي حسن وحتى فريق العمل في المكتب الفني عنان وشمبات وخواجة ومحمد سيد أحمد ومحمد سليمان وناصر عبد العاطي وامجد دهب دا فريق عمل يستحيل تلقاهو في أي مؤسسة صحفية.. أما صحيفة الموج الازرق فكانت امتداد طبيعي لصحيفة الهلال بمعنى انو كل التيم الاشتغل في صحيفة الهلال كان هو (عضم) الموج الازرق زي ما بقولوا ناس الكورة مع بعض الإضافات النوعية الجيدة جداً والمختلفة تماماً عن الخامات الموجودة في سوق الصحافة الرياضية.. والموج الأزرق بالتأكيد كانت إضافة حقيقية بالنسبة لي لأني قدمت فيها شغل مختلف عن شغلي في جريدة الهلال.. أي نعم كنت برضو صحفي بتاع ميدان ومتابعات لكن في الموج طرقت مجالات متعددة في نوع العمل التحريري.. الاجواء الأسرية فيها كانت امتداد طبيعي لاجواء صحيفة الهلال وهي تجربة افتخر بيها وقدمت لي الكتير.. أما الإذاعة الطبية فدي الحديث عنها يطول.. أعتبرها مغامرة مش تجربة جديدة لانو التجارب بالنسبة للصحفي أعتقد أنها بتكون في نفس المجال يعني في الصحف لكن فجأة تخلي ضجيج صالات التحرير وصخب المدرجات والملاعب وتتجه لنوع جديد من العمل الإعلامي أعتقد أنها مغامرة أو مجازفة..
&& ماهي قصتك مع الاذاعة الطبية..؟؟
حكايتي مع الإذاعة الطبية بدأت باتصال هاتفي من اخوي وصديقي الغالي ناصف ابوملاذ قال لي رأيك شنو تقدم برنامج رياضي؟ في البداية اخدت لي ضحكة كبيرة وقلت ليهو يا ناصف انت دمك خفيف والله.. المهم ناصف قال لي بالمناسبة انا جادي معاك وقال أستاذ عثمان حسن مكي نازل إجازة وعايزك تقدم البرنامج.. وأنا رشحتك ليهو.. المهم المسألة بقت جادة وانا رفضت العرض وقلت ليهو معليش يا ناصف دي مغامرة انا ما بقدر عليها ولو أستاذ عثمان عايزني اكتب ليهو أخبار رياضية ما عندي مشكلة لكن أقدم البرنامج دي ما تخصصي واكيد ح أفشل.. في المساء استقبلت مكالمة مطولة من أستاذ عثمان وطبعاً انا والأستاذ اشتغلنا في التغيير تلاتة سنوات لما كنت رئيس القسم الرياضي.. حاولت اقول ليهو انا ممكن أكون ضيف لكن أقدم البرنامج والله دا تكنيك انا ما بعرف ليهو.. في النهاية اقنعني وكان أول اجتماع بيني وأستاذ عثمان وأستاذ مصطفى مدير عام الإذاعة وقدام أستاذ مصطفى قلت ليهو يا استاذ انا ما حصل قدمت برنامج عشان نكون واضحين من البداية.. المهم في اليوم التالي قابلنا دكتور حافظ حميدة ومعاي أستاذ عثمان واتفقنا على كل الأمور الإدارية والفنية واستلمت البرنامج وحقيقة لقيت تعاون ما عادي من كل الزملاء في الإذاعة وادوني إحساس انهم بعرفوني من سنوات وعبر سوبر هاتريك الإلكترونية ببعث ليهم بتحايا صادقة بداية من أستاذ مصطفى وهاشم أحمد محمد مدير البرامج واخوي حسام كريم ومحمد حبيب ومحمد يوسف وعزو بهجة والباقر وولاء إبراهيم وعائشة إبراهيم ويسرا حسن ونازك عبد الرحمن وحجازية محمد سعيد ووعد كريم واسراء إسماعيل وناهد الحاج وما أنسى كل الزملاء كندورة وعثمان وبخاري وسليمان وعماد ومروان.. خالد شوقار وبهاء الدين مهدي سليمان وفخر الدين حسون ..والله العظيم لو اتكلمت عنهم محتاج لمساحة وزمن.. ديل وقفوا معاي وساندوني ووجهوني وحفزوني.. كانوا ولا زالوا أساتذة بالنسبة لي لأنهم سهلوا لي الشغل بوقفتهم القوية معاي.. أسأل الله أن يجعل ما قدموه لي في ميزان حسناتهم.. الإذاعة الطبية وبرنامج المجال الرياضي عالم براهو فيهو تفاصيل مثيرة والحديث عنو ذو شجون..ويكفي انو اتعرفت من خلال الإذاعة والبرنامج على شخصيات جميلة في الصحافة والإدارة والتدريب والتشجيع والطب والقانون.
&& وكيف ينظرون للاعلامي السوداني من اي زاوية في الفضائيات الخارجية والصحف ؟؟
الإعلامي السوداني موهوب ومتميز ومتمكن بالفطرة رغم شح الإمكانات وضعف بيئة العمل لكن رغم الظروف القاسية بيبدع لانو مثقف ومطلع ومن وجهة نظري الشخصية المتواضعة أعتقد أن إهتمام الإعلامي السوداني بتلاوة القرآن الكريم والقراءة واحدة من أسباب التميز الكبير ليهو.. لذلك يجد كل التقدير والاحترام في كل مواقع العمل الاعلامي بالخارج.
&& بصراحة ماهي الفوارق بين الاذاعة والصحف وايهما امتع بصراحة ولماذا ؟؟؟
بصراحة شديدة جداً الفوارق كتيرة وكبيرة بين الإذاعة والصحف.. والمتعة بالجد في الصحف لانو عندك براح واسع من الزمن تجتهد خلالو في مطاردة الأخبار وملاحقتها لكن في الإذاعة انت مرتبط بمدى زمني محدد وواضح ومباشر.. عكس الصحف انت ممكن تلحق معلومة خاطئة وتعالجها قبل ما تترسل الصحيفة للمطبعة.
&& وهل البيئة والطفولة لعبت دورا مؤثرا في بروز شخصية عبد العليم مخاوي كاعلامي طرق حتى ابواب الاحتراف في المهنة ؟؟ اكيد البيئة عندها أثر كبير.. جذوري من كردفان لكن ولدت وترعرعت في حي القوز بالخرطوم.. طبعاً انا في المرحلة قبل الدراسية درست شهور بسيطة في روضة ماما سيدة في القوز لكن ما حبيت الروضة عشان كده أهلي ودوني خلوة مسجد الشيخ العركي وهناك لقيت الشيخ ابكر والشيخ موسى محمد حسين ديل علموني تلاوة القرآن الكريم وحفظت عدد من السور وانا في سن صغيرة لذلك لما درست في مدرسة القوز (1) ما لقيت صعوبات في التعلم وكنت من ضمن العشرة الأوائل وكنت متميز جداً في التربية الإسلامية واللغة العربية وأعتقد أن حبي للتربية الإسلامية واللغة العربية ساعدني في الشغل لانو الاعلامي ما مفروض يعاني من مشكلة مع اللغة العربية خاصة.
&& ونسأل عن دور الاسرة في السابق والان والى اي مدى انت مدين لهم بالنجاح الذي تحقق خلال مسيرتك الاعلامية ؟؟
كل النجاحات الحققتها بعد التوفيق الإلهي يرجع الفضل لأفراد أسرتي.. والدتي واخواني وقفوا معاي وساندوني وخففوا عني معاناتي مع الصحافة خاصة في بداياتي.. ويكفي انهم استحملوني في تأخيري وزمني المضطرب.. لما تلقى أهلك متوترين وخايفين عليك لأنك اتأخرت في الشغل دي براها أكبر مسؤولية والله لذلك اعتبر أهلي شركاء في ما حققته من نجاح وعبر سوبر هاتريك الإلكترونية ببعث ليهم بتحايا من جوووة قلبي.
&& والى اي مدى انت متفاعل مع اهل الحي بمنطقة القوز ام ان ظروف العمل الاعلامي جعلتك مغتربا داخل بلدك ؟؟
بصراحة والله يا طارق انا مقصر شديد مع اهل الحي رغم إني بساعدهم من خلال نشر قضايا الحي في الصحف وفي صفحاتي في مواقع التواصل الاجتماعي وزي ما قلت طبيعة شغلي في الإعلام خلتني زي المغترب داخل البلد باعتبار إني بطلع الصباح وبدخل البيت في الساعات الأولى من فجر اليوم التالي.. لكن رغم الظروف دي في حاجات لازم اشارك فيها زي الافراح والاتراح وزيارة المرضى خاصة في يوم عطلتي الأسبوعية.. طبعاً إجازتي الأسبوعية (مشاترة) شديد لأنها في يوم الخميس والدوام ببدا يوم الجمعة لذلك من النادر جداً ألقى أصحابي في يوم إجازتي.
&& بصراحة هل وفي ظل المتاح حاليا يمكن للاعلام السوداني ان ينافس اقرانه في الوطن العربي ام ان المسافة بعيدة ؟؟ المنافسة ممكنة لكن للأسف الشديد التفوق ح يكون في صالح العالم الخارجي البتتوفر فيهو كل المعينات ويكفي انو أولادنا مبدعين ومتميزين بدليل انهم من العناصر الأساسية في كل المؤسسات الإعلامية في الدول العربية والأمثلة لا حصر لها.
&& الكلتشات افة الاعلام عموما في الصحف والاذاعات والفضائيات كيف تتعامل معها ؟؟؟
هههههههههههههههه.. اكيد هي سلاح العاجز أو الزول الما واثق في امكاناتو.. الحمد لله رب العالمين لغاية الآن ما واجهتني أي كلتشات في أي مكان عملت فيهو أو قد يكون اتعرضت لمضايقات محدودة في بعض الصحف لكن في الإذاعة حقيقة ما لقيت غير التعاون والتوجيه والتحفيز المستمر ودي نعمة الواحد يحمد ربنا عليها..بالمناسبة ممكن تتجاهل أي كلتشات عشان ما تدي الناس إحساس إنك متضايق من تصرف محدد.
&&وماهو سقف طموحاتك في المجال الاعلامي ؟؟
بلا حدود بصراحة.. أسأل الله التوفيق والسداد للجميع إن شاء الله.. أهم حاجة يا طارق إنك تكون مقتنع وراضي بالعمل البتقدمو وأهم حاجة انك تخاف الله في الشغل دا.
&& ونسال عن اشخاص كان لهم الفضل في تشكيل شخصيتك الاعلامية ؟؟
حقيقة اصعب سؤال وعايز زمن واستدعاء الذاكرة.. حمزة الشيخ الخاتمي و الراحل فضل الله كودي وعبد الحفيظ عكود وطارق أحمد المصطفى وصديق رمضان والخير فاروق وهنادي الصديق وعبد اللطيف الهادي وشجرابي ومحمد احمد دسوقي وفائز رمضان وفائز ديدي وعاطف الجمصي وأبو بكر شرش وعاصم وراق ومحمد الطيب الأمين والرشيد علي عمر ومجدي دمباوي ومحمد عمر الامين والنور يوسف ومحمد غبوش وعمار الضو وقسم خالد وياسر عائس والقلع عثمان وهيثم السيد ومحمد الجزولي وطارق محمد عبد الله ومهند ضمرة وعلي حسن وهيثم عبد الرحيم وإيمان بدوي وسمية سيد وحيدر المكاشفي وامجد مصطفى أمين وأبو عاقلة اماسا وحافظ خوجلي وصلاح خوجلي وعبد المنعم محمد سيد أحمد وناجي الطيب وأيمن كمون وبرعي الابنوسي ومحمود النور ومحمد آدم بركة وغيرهم من الزملاء والأساتذة الوقفو معاي وقفة يستحيل أنساها إن شاء الله..وهم أيضاً عندهم دور كبير في كل حياتي المهنية ربنا يديهم الصحة والعافية. 
&& تحايا الصباح والمساء لمن تبعثها ؟؟؟
لكل من يعرف عبد العليم مخاوي وتحية خاصة جداً لرفاق الحرف والكلمة متعهم الله بالصحة والعافية.
&& وكيف يكون احساسك وانت تكتب او تقرأ خبرا لفوز نادي سوداني او المنتخب الوطني في كرة القدم او انجاز يتحقق عبر اي من المناشط الاخري ؟؟؟
حقيقة إحساس بالفخر والاعتزاز.. بكون في قمة السعادة وبحاول ارتب نفسي بصورة طيبة قبل ما أدخل الاستديو.. طبعاً في الإذاعة لازم تختار عباراتك وتدي المستمعين إحساس إنك مبسوط بالانتصار دا عشان يشاركوك الفرحة.
&& لديك حزمة من الرسائل ؟؟
^^لرئيس الهلال السيد اشرف الكاردينال ؟؟
شكراً على العمل الكبير والجميل في مجال المنشآت من الجوهرة الزرقاء والفندق والمستشفى والنادي الاسري وكل ما يتعلق بالأمور الإدارية الفيها إنجازات ملموسة على أرض الواقع.. ورسالتي ليهو ياريت يبقى عندنا فريق كورة لا يقل روعة عن الجوهرة الزرقاء لانو الفريق القوي بكمل جمال الاستاد الفخيم وبتمنى في الولاية الثانية نشهد استقرار في الأجهزة الفنية والإدارية بالنادي ونشوف محترفين يصنعوا الفارق ويحققوا لقب قاري للنادي.
^^وماذا تقول في رسالة لقادة الاتحاد السوداني لكرة القدم معتصم ،مجدي واسامة عطا المنان ……؟؟؟
اتفقنا أو اختلفنا معهم نشكرهم وياريت يفسحوا المجال لغيرهم.
^^ للارباب صلاح ادريس وبصفة خاصة في ظل ارهاصات ترشحه لرئاسة نادي المريخ ؟؟
 
راجع حساباتك وتحسس عشقك للهلال.. انت قدمت عمل متميز في فترتك اختلفنا أو اتفقنا معك لكن بصراحة ما تفعله خصم كتير جداً من مكانتك وسط جمهور الهلال الكان في يوم من الأيام بهتف ليك تيمك صاح يا صلاح وغيرها.. ياريت ترجع والهلال يسع الجميع. && وماهي رسالتك للقائمين على امر فضائية الهلال ؟؟
شكراً على المجهودات الكبيرة والعمل الاحترافي الجميل.. ياريت الفضائية تجوب كل قرى البلاد وتبحث عن المحاربين القدامى للهلال في كل المناشط الرياضية المختلفة وتعمل توثيق لمسيرتهم رغم انو في برنامج بالمستوى دا حالياً على شاشة قناة الهلال. &&وماهي رسالتك للجمهور الرياضي السوداني ؟؟
جمهورنا واعي ومعلم وملهم ورسالتي ليهم ياريت نبعد عن إثارة النعرات العصبية خوفاً من العواقب الوخيمة للتعصب الأعمى.
&& ورسالتك لكمال شداد ماذا تقول فيها ؟؟
انت راجل محترم ونزيه وفاهم أتمنى فوزك بمقعد الرئيس في العمومية المقبلة واتمنى إنك تختار فريق عملك بصورة دقيقة تفادياً للأخطاء الحصلت في فترتك الماضية.
&& بالمناسبة اعتبار ماسيكون هل تتمني ان يكون اولادك اعلاميين ام تفضل ان يتجهوا لمجال اخر؟؟
هههههههههههههههه تعرف يا طارق.. انا أؤمن تماماً بالرأي والرأي الآخر لذلك أولادي عندهم مطلق الحرية في اختيار المجال العايزنو.. لأني لو فرضت عليهم يمشو في مجالي قد يفشلوا واكون انا السبب.
&& الهلال ومانشيستر يونايتد في دواخل مخاوي الي اين يتجها ؟؟
الله الله الله.. الاتنين عينين في رأس واحد.. الهلال الجمال واليونايتد المتعة والانتماء.. بحس انو في أشياء كتيرة مشتركة بيناتهم حسب وجهة نظري الشخصية المتواضعة.. بتمنى اشوفهم الاتنين متوجين بالألقاب والبطولات محلياً وقارياً وعالميًا.
&& رحلة انغولا مع فريق الهلال ماذا اضافت لك خاصة وانها كانت أولى رحلاتك الخارجية ؟؟
أول رحلة خارجية بالنسبة لي وكانت جميلة بكل تفاصيلها رافقني فيها من الزملاء أستاذي الرشيد علي عمر ورفيق الكفاح إبراهيم الجيلي.. رحلة عرفتني على هلالاب يشرفوا والله بقيادة الجنرال عبد الرحمن أبو مرين رئيس البعثة والأستاذ إبراهيم خالد حسن عباس والأسد فوزي المرضي والهميم عبد المهيمن الأمين وعمر بخيت واتير توماس وعبد الرحمن الدعيع وعبد اللطيف بوي وبشة وكاريكا ويوسف محمد وادوارد سادومبا والصربي ميشو والعقيد حسن محمد صالح..الرحلة عمقت أواصر التواصل بيني ولاعبي وإداريي الهلال وعمقت المحبة بيني واستاذي الرشيد واخوي إبراهيم الجيلي والحمد لله رب العالمين رجعنا بورقة العبور بعد التعادل امام ريكرياتيفو كالا في مقاطعة هوامبو الانغولية.
&& كلمة اخيرة ماذا تقول فيها…؟؟
شكراً جميلاً يا طارق وانا ما عايز اقصم ظهرك وأقول إنك أستاذي الاستثنائي واتعلمت منك الكتير في السنوات الماضية واتمنى أكون على الدوام عند حسن ظنك
…………………………………………………………………………………………………………………………………..
مع تحيات :

الجامعة العربية المفتوحة..……………….شركة اربيل العالمية ……………………….وبي انتلجنت الهندسية 

                                 

 

         %d8%a7%d8%b1%d8%a8%d9%8a%d9%84-%d9%84%d8%b9%d8%a7%d9%84%d9%85%d9%8a%d8%a9-%d8%a8%d8%a7%d9%84%d8%a7%d8%ad%d9%85%d8%b1-%d9%88%d8%a7%d9%84%d8%a7%d8%b5%d9%81%d8%b1         

 

 

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى